महेन्द्नगर– कञ्चनपुरको भीमदत्त नगरपालिकाले कोरोना भाइरस (कोभिड– १९) स‌ंक्रमणको जोखिमलाई मध्यनजर गरी पश्चिमी सीमा नाका गड्डाचौकीलाई केही दिन बन्द गर्न संघ (केन्द्र) सरकारसमक्ष अनुरोध गरेको छ ।

भीमदत्त नगरपालिका नगर कार्यपालिकाको शनिबार बसेको ४४ औं कार्यपालिकाको आकस्मिक बैठकले गड्डाचौकी नाकाबाट फर्किनेको संख्या अत्यधिक बढेकाले केही दिनका लागि नाका बन्द गर्न अनुरोध गर्ने निर्णय गरेको हो ।

भीमदत्त नगरपालिकाका प्रवक्ता हिमाल बहादुर चन्दले कोरोना संक्रमणको जोखिम बढ्दै गएकाले कार्यपालिकाको आकस्मिक बैठक बसेर नाका बन्द गर्न संघ सरकारलाई अनुरोध गर्ने लगायतका निर्णय गरिएको जानकारी दिए ।

‘कारोनाको संक्रमण जोखिम बढ्दै गएको छ, नाकामा स्वदेश फर्किनेको भिड थामी नसक्नु छ, यस्तो अवस्थामा जोखिमको धेरै सम्भावना हुन्छ,’ नगर प्रवक्ता चन्दले भने, ‘यी सबै अवस्थालाई मध्यनजर गर्दै नगरकार्यपालिकाको बैठकले नाका बन्दका लागि संघ सरकारसमक्ष अनुरोध गर्ने निर्णय गरेको हो ।’

बैठकले कोरोना रोकथामका लागि स्वमय् सेवक परिचालन, कोरोना विरुद्ध खटिएका स्वास्थ्यमकर्मीलाई बोनस दिने, ५० शैय्याको प्रीफ्याब आइसोलेसन कक्ष स्थापनाका लागि प्रदेश सरकारलाई अनुरोध गर्ने लगायतका निर्णय गरेको छ ।