एजेन्सी- अमेरिकी राष्ट्रपति डोनल्ड ट्रम्पले सर्वोच्च अदालतमा रिक्त न्यायाधीश पदमा महिलालाई नै नियुक्त गर्ने प्रतबिद्धता जनाएका छन् ।

सर्वोच्च अदालतकी न्यायाधीश रुथ बेडर गिन्सबर्गको ८७ वर्षको उमेरमा शुक्रवार निधन भएपछि उक्त रिक्त स्थानमा आउँदो साता महिलालाई नै नियुक्त गर्ने ट्रम्पले जनाएका हुन् ।

ट्रम्पका डेमोक्र्याट प्रतिद्वन्द्वी जो बाइडनले गिन्सबर्गको ठाउँमा अर्को न्यायाधीश ल्याउनका लागि नोभेम्बरमा हुने राष्ट्रपतीय चुनावसम्म पर्खिनुपर्ने बताएका छन् ।

अमेरिकी कानुनका महत्त्वपूर्ण मुद्दामा निर्णय सुनाउनका लागि नौ सदस्यीय अदालतको सैद्धान्तिक सन्तुलन निकै महत्त्वपूर्ण मानिने गरिएको छ ।

सत्ताइस वर्ष सेवा गरेकी गिन्सबर्ग अदालतकी चार उदारवादी न्यायाधीशमध्येको एक भएको बीबीसीले जनाएको छ ।

उनको निधनसँगै नियुक्त हुने नयाँ न्यायाधीशले अदालतको शक्ति सन्तुलनलाई कन्जरभेटिभतर्फ निर्णायक रूपमा परिवर्तन गर्न सक्ने विश्लेषण हुन थालेका छन् ।