काठमाडौं – चीनले कालापानी र लिपुलेक विवादबारे त्रिपक्षीय वार्तामा नबस्ने संकेत गरेको छ ।

मंगलबार चिनियाँ विदेश मन्त्रालयका प्रवक्ता जाओ लिजिआनले नियमित प्रेस बिफ्रिङमा कालापानी नेपाल र भारतीबीचको सीमासम्बन्धी मुद्दा भएकाले एकतर्फी क्रियाकलाप रोकेर दुबै मुलुकले मित्रवत छलफलबाट समस्या समाधान गर्नु पर्ने सुझाव दिएको छ ।

भारतीय सेना प्रमुख मनोजमुकुन्द नरवणेको भारतले नयाँ सडक उद्घाटन गरेको विषयमा नेपालको असन्तुष्टि कसैबाट प्रेरित भएको भन्‍ने अभिव्यक्तिको प्रतिक्रियामा लिजिआनले उक्त विषयमा खासै रूचि दिएनन् ।

भारतीय रक्षामन्त्री राजनाथ सिंहले ८ मेमा उक्त कालापानी क्षेत्र समेत समेटिएको सडकको उद्घाटन गरेपछि त्यसको चर्को बिरोध भइरहेका बेला चिनियाँ धारणा पनि बाहिरिएको हो ।

प्रधानमन्त्री केपी शर्मा ओलीले नेपालले चिनियाँ सरकारी अधिकारीसंग कुरा गरिसकेको जानकारी दिइरहँदा चीनको धारणा सार्वजनिक भएको हो ।

विवाद समाधानमा त्रिदेशीय वार्ता आवश्यक रहेको आवाज उठिरहेका बेला चीनले भने दुई देशबिच कुटनितिक माध्यमबाट समस्या समाधान गर्न आग्रह गरेको हो ।

भारतले नेपाली भू-भागमा नै सकड बनाएपछि नेपाल सरकारले उक्त अतिक्रमित क्षेत्रसमेत समेटेर नयाँ नक्सा स्वीकृत गरिसकेको छ ।