काठमाडौं- सत्तारुढ दल नेपाल कम्युनिस्ट पार्टी(नेकपा) को सचिवालय बैठक सकिएको छ ।

सचिवालय बैठक सकिएसँगै्र प्रधानमन्त्री केपी शर्मा ओली राष्ट्रपति विद्यादेवी भण्डारीलाई भेट गर्न शितलनिवास पुगेका छन् ।

प्रधानमन्त्रीका प्रेस सल्लाहकार सूर्य थापाका अनुसार बैठक सकिएसँगै प्रधानमन्त्री शितल निवास गएका हुन् ।

प्रधानमन्त्री किन शितलनिवास जानु भएको हो भन्ने बैठकपछि पत्रकारको प्रश्नमा नेकपाका प्रवक्ता नारायणकाजी श्रेष्ठले केही जवाफ दिएनन् । बैठकमा कोरोना भाइरस नियन्त्रण, सरकारका निर्णयहरुबारे छलफल भएको उनले बताए ।

संवैधानिक निकाय लामो समय रिक्त रहँदा नियुक्ति लगायतका काम गर्न नसकिएकाले अध्ययादेश आवश्यक भएको प्रधामन्त्री ओलीले बैठकमा बताएको श्रेष्ठको भनाइ थियो ।

दुई घन्टा भन्दा लामो समय बसेको नेकपा सचिवालय बैठकमा सरकारले गरेको पछिल्लो निर्णय लगायका विषयमा छलफल भएको छ ।

सोमबार बसेको मन्त्रिपरिषद् बैठकले राजनीतिक दलसम्बन्धी कानूनलाई संशोध गर्ने गरी संसदीय दल वा केन्द्रीय समितिमध्ये एकमा मात्र ४० प्रतिशत बहुमत भए पार्टी फुटाउन मिल्ने गरी अध्ययादेश ल्याउने तथा संवैधानिक परिषद्को गणपुरक संख्या घटाउने अध्यादेश ल्याउने निर्णय गरेको थियो । उक्त दुबै अध्यादेश राष्ट्रपति विद्यादेवी भण्डारीबाट जारीसमेत भइसकेको छ ।

अध्ययादेश ल्याउने निर्णय गरेसँगै नेकपाले सचिवालय बैठक बोलाएको थियो ।