काठमाडौं– यात्रुसँग बढी भाडा लिएको भन्दै प्रहरीले २३ जनालाई पक्राउ गरेको छ ।

काठमाडौं उपत्यकाबाट बहिरिने यात्रुसँग तोकिएको भन्दा बढी भाडा लिएपछि उनीहरुलाई शुक्रबार पक्राउ गरिएको प्रहरीले जनाएको छ ।

काठमाडौं बाहिर जाने यात्रुसँग तोकिए भन्दा बढी भाडा लिएको आरोपमा बारा घर भई बल्खु बस्ने ३२ वर्षीय मुकेशप्रसाद साह लगायत २३ जनालाई शुक्रबार बिहान प्रहरीले नियन्त्रणमा लिएको हो ।

काठमाडौंको बल्खु र कलंकीबाट उपत्यका बाहिर जाने यात्रुहरुसँग तोकिएको भन्दा बढी भाडा लिइरहेको सूचनाको आधारमा महानगरीय प्रहरी वृत्त कालिमाटीबाट खटिएको प्रहरीले उनीहरुलाई पक्राउ गरेको हो । यस सम्बन्धमा प्रहरीले थप अनुसन्धान गरिरहेको जनाएको छ ।

कोरोना भाइरस (कोभिड–१९) को संक्रमणले विश्वभर महामारीको रुप लिन थालेपछि राजधानी उपत्यकाबाट सर्वसाधरण बाहिरिने क्रम बढेको छ । चार दिनमा साढे ३ लाख मानिस काठमाडौंबाट बाहिरिएको ट्राफिक प्रहरीले जनाएको छ ।