काठमाडौं– कोरोना भाइरस संक्रमणको सम्भावित जोखिम नियन्त्रका लागि सरकारले यूरोप, खाडी मुलुकसहित दक्षिण कोरिया, जापान लगायतका देशबाट नेपाल प्रवेशमा रोक लगाएको छ ।

उपप्रधान एवं रक्षामन्त्री ईश्वर पोखरलेको संयोजकत्वमा गठित कोभिड–१९ संक्रमण, रोकथाम तथा नियन्त्रण उच्चस्तरीय समन्वय समितिको बुधवार बसेको बैठकले युरोपका सबै मुलुकहरु, पश्चिम एसिया लगायत खाडी क्षेत्रका मुलुकहरु, इरान, टर्की, मलेसिया, दक्षिण कोरिया, जापानबाट आउने र ती मुलुकलाई ट्रान्जिट बनाइ अन्य मुलुबाट आउने नागरिकमाथि रोक लगाएको थियो । यो प्रतिवन्ध चैत ७ गते शुक्रवार(आज) मध्यरातिबाट लागू हुँदैछ ।

माथि उल्लेख गरिएका देशबाट आउने सबै यात्रुलाई २० मार्च २०२० मध्यरातिदेखि लागू हुने गरी १५ अप्रिल २०२० (वैशाख ३ गते) सम्म आगमनमा प्रतिवन्ध लगाउने निर्णय गरेको भएको थियो ।

यो निर्णयसँगै प्रतिबन्ध गरिएका देशका नागरिक मात्र होइन, त्यहाँ रहेका नेपाली, गैरआवासीय नेपाल लगायत कोही पनि नेपाल भित्रन मिल्ने छैन भने प्रतिवन्धमा रहेका देशलाई ट्रान्जिट बनाएरसमेत नेपाल भित्रन नमिल्ने भएको छ ।

नेपाल नागरिक उड्डयन प्राधिकरणले नेपाल आउन प्रतिबन्ध लागेका मुलुकको नाम सार्वजनिक गरेको छ । प्राधिकरणकाका अनुसार युरोप, पश्चिम एशिया, सबै गल्फ देशहरु, टर्की, मलेसिया, दक्षिण कोरिया, जापान सहितका देशहरुबाट नेपाल आउन प्रतिवन्ध लगाइएको छ ।