एजेन्सी- इटाली नेशन्स लिग फुटबलको फाइनल्स चरणमा प्रवेश गरेको छ ।

समूह ए थ्री अन्तर्गत बुधबार राति भएको खेलमा बोज्निया–हर्जगोविनालाई २–० ले पराजित गर्दै इटाली फाइनल्स चरणमा पुगेको हो ।

अवे मैदानमा भएको खेलमा इटालीलाई जिताउन बेलोती र बेरार्डीले गोल गरे । इटाली १२ अंकसहित समूहको शीर्ष स्थानमा रहँदै फाइनल चरण पुगेको हो ।

यस्तै बुधबार राति नेदरल्याण्डसले पोल्याण्डलाई २–१ ले पराजित गरे पनि फाइनल्स चरणमा स्थान बनाउन सकेन ।

नेदरल्याण्डसका लागि ७७औँ मिनेटमा मेम्फिस डिपे र ८४औँ मिनेटमा जर्जिनिओ विनाल्डमले पेनाल्टीमा गोल गरे ।

पोल्याण्डले पाँचौँ मिनेटमा कामिल जोज्विकले गोल गर्दै अग्रता दिलाए पनि त्यसलाई कायम राख्न नसक्दा हार बेहोर्‍यो । जितपछि नेदरल्याण्डसको ११ अंक भयो ।