काठमाडौं – स्पेनिस ला लिगाको यो सिजनको अन्तिम खेलमा बार्सिलोनाले अल्भासविरुद्ध शानदार जीत निकालेको छ ।

अल्भासको घरेलु मैदान मेन्डीजोरोजामा भएको खेलमा बार्सिलोनाले ५–० गोल अन्तरको जीत निकाल्दै यो सिजनको अन्त्य गरेको हो ।

ला लिगाको उपाधिबाट चुकेको बार्सिलोनाको अन्तिम खेलमा मेस्सीले दुई गोल गरे भने अंशु फाती, लुइस स्वारेज र नेल्सन सेमेडोले समान एक–एक गोल गरे ।

खेलको २४ औं मिनेटमा फातीले गोल गर्दै टिमलाई अग्रता दिलाएका थिए भने मेस्सीले ३४ र ७५ औं मिनेटमा गोल गर्दा स्वारेजले ४४ औं र सेमेडोले ५७ औं मिनेटमा गोल गरेका थिए ।

अन्तिम खेलमा दुई गोल गरेका मेस्सीले ला लिगाको यो सिजनमा २५ गोल गरेका छन् ।

बार्सिलोनाले पछिल्लो १३ वर्षमा ५ पटक ला लिगाको उपाधि हात पारेको थियो । तर यो सिजनको ला लिगाको उपाधि एक खेल अगावै रियल मड्रिडले उचालिसकेको छ ।

मेस्सीलाई अवार्ड

ला लिगाको शीर्ष गोल कर्ता बनेका मेस्सीले स्पेनिस पत्रिका मार्काले वर्षेनी प्रदान गर्ने पीचीची अवार्ड पाएका छन् ।

यो सँगै उनले सात पटक यो अवार्ड जित्दै ला लिगामा कीर्तिमान बनाएका छन् । सय वर्षमा यो अवार्ड अहिलेसम्म कसैले पनि सात पटक पाएका छैनन् ।

क्लबले उपाधि नजित्दा आफूले पाउने यस्ता अवार्डले कुनै महत्व नराख्ने मेस्सीले बताउँदै आएका छन् ।