काठमाडौं- कोभिड–१९ संकट व्यवस्थापन सेन्टर (सीसीएमसी) निर्देशक समितिले धेरै संख्यामा नेपाली रहेका देशमा उद्धार उडानलाई प्राथमिकता दिने निर्णय गरेको छ ।

आइतबार सिंहदरबारमा बसेको बैठकले धेरै संख्यामा नेपाली रहेका देशबाट उद्धार गर्न हवाई उडानलाई प्राथमिकता दिने निर्णय गरेको हो। सरकारले अलपत्र नागरिकलाई उद्धार गर्दै आएको छ।

प्रधानमन्त्री तथा मन्त्रिपरिषद्को कार्यालयका सचिव महेन्द्रप्रसाद गुरागाईंले कोभिड १९ रोकथाम तथा नियन्त्रणका लागि सरकारले गरेको लकडाउन परिमार्जन गर्न सम्बन्धित मन्त्रालयबाट मन्त्रिपरिषदमा प्रस्ताव लैजाने निर्णय भएको जानकारी दिए ।

उनले भने, ‘संक्रमणको संख्यामा हाल केही कमी हुँदै गएको भएपनि यसलाई नियन्त्रित रुपमा राख्न पर्ने नै विश्लेषण भएको छ। साउन ६ गतेसम्म कायम भएको लकडाउन परिमार्जन गर्न के कस्तो क्रियाकलापहरु गर्न सकिन्छ वा यसलाई कसरी लानुपर्छ भन्ने विषयमा फेरि छलफल गरेर नेपाल सरकार मन्त्रिपरिषदमा सम्बन्धित मन्त्रालयबाट प्रस्ताव लैजाने गरी निर्णय भएको छ ।’

उनले धेरै श्रमिकलाई उद्धार गर्न बाँकी रहेका देशहरुमा हवाई उडानलाई प्राथमिकता दिने बताए ।

उनले भने, ‘जुन मुलुकबाट धेरैजना आउन बाँकी रहेको छन् ती मुलुकहरुबाट श्रमिक ल्याउनलाई हवाई उडानको प्राथमिकीरण गर्ने निर्णय भएको छ ।’