काठमाडौं- सत्तारूढ नेपाल कम्युनिस्ट पार्टी नेकपा सचिवालयका चार सदस्य बिहानैदेखि छलफलमा जुटेका छन् ।

झलनाथ खनाल, माधवकुमार नेपाल र नारायणकाजी छलफलका लागि बिहानै प्रचण्ड निवास पुगेका थिए ।

बिहान ९ बजेदेखि जारी बैठकमा पार्टीको आज बस्ने स्थायी कमिटी बैठकका एजेन्डा के बनाउने भन्ने विषयमा छलफल जारी रहेको खुमलटार स्रोतले जनाएको छ ।

शनिबार बसेको सचिवालय बैठकमा प्रधानमन्त्री एवम् नेकपा अध्यक्ष केपी शर्मा ओली र अर्का अध्यक्ष प्रचण्डबीच चोचोमोचो भएको भन्दै वरिष्ठ नेता माधव नेपालले असन्तुष्टि जनाएका थिए।

सचिवालय बैठकमा प्रधानमन्त्री ओली र अध्यक्ष प्रचण्डले मंसिरमा महाधिवेशन गर्ने प्रस्ताव गरेका थिए।

दुई अध्यक्षको धारणा एउटै आएपछि सचिवालयका अन्य सदस्यहरुले यसलाई दुई अध्यक्ष मिलेको रूपमा बुझेका थिए। तर प्रचण्डको सचिवालयले भने यसलाई खण्डन गरेको थियो।