काठमाडौं- राष्ट्रिय आविस्कार केन्द्रका संस्थापक महावीर पुनले मानव स्वास्थ्यमा देखिने विभिन्न समस्याहरुको जाँच गर्न मिल्ने मोबाइल एप्लिकेशन बनाउन आह्वान गरेका छन् ।

उनले बिरामी आफैले आफ्नो मुटुको धड्कन, शरीरको तापक्रम, रगतमा अक्सिजनको मात्रा तथा रक्तचाप जाँच्न सक्ने र सोझै डाक्टरहरुलाई पठाउन सक्ने खालको एप्लिकेशन बनाउन आह्वान गरेका हुन् ।

उनले यस्ता स्वास्थ्य सम्बन्धी महत्वपूर्ण संकेत जाँच्न मिल्ने एप कोरोना महामारीमा पनि धेरै उपयोगी हुनसक्ने जनाएका छन ।

यस्तो मोबाइल एप्लिकेशन बनाउनको लागि अनुसन्धान गर्न चाहिने आवश्यक खर्च राष्ट्रिय आविस्कार केन्द्रले उपलब्ध गराउने समेत बताएका छन् ।

यसको लागि कम्तिमा चार जनाको टिम मिलेर छोटो अवधारणा पत्र mahabir@nicenepal.org इमेलमा पठाउन सकिने समेत उनले बताएका छन् ।