पर्सा – पर्साको बहुदरामाई नगरपालिका वडा नम्बर – ९ विश्रामपुरको मौजेटोलस्थित एक मस्जिदमा लुकेका ‘जमाती’बारे सूचना दिदा स्थानीबासीमाथि नै हमला भएको छ ।

शनिबार बेलुकीको उक्त घटनामा १५ जना भन्दाबढी घाइते भएका छन् । त्यसमध्ये ८ जनाको अवस्था गम्भीर छ । उनीहरुको वीरगंजका विभिन्न अस्पतालहरूमा उपचार भइरहेको छ ।

‘जमाती’ले स्थानीयवासीमाथि हमला गरेपछि भएको झडपमा फैयाद देवान, फतिमा खातुन, मखमुल राय भाट, बडिया राय भाट, चन्दन गुप्ता कलवार, सुनिल गुप्ता कलवार, राधेश्याम गुप्ता र सुशीला देवी घाइते भएका छन्।

वडासदस्य फकरुद्धिन अहमद देवानको नेतृत्वमा मौजेटोलस्थित मस्जिदबाट शनिबार बेलुकी केही व्यक्तिले स्थानीयका घरमा ढुङ्गा, इँटा प्रहार गरेपछि त्यही विषयमा झडप भएको स्थानीयवासीको दावी छ ।

मस्जिदमा बाहिरका ‘जमाती’ ल्याएर राखिएको भन्दै स्थानीयवासीले प्रहरीलाई खबर गरेपछि मस्जिदबाट र मस्जिद छेउछाउमा रहेका मुस्लिमहरूको त्यहाँका स्थानीयवासीमाथि हमला गरेको वडा अध्यक्ष रवि गुप्ताले बताएका छन् ।

प्रहरीले झडपमा संलग्न भएको आरोपमा स्थानीय नसुरलाह मियाँसहित पाँच जनालाई नियन्त्रणमा लिएको छ ।

पर्साकी प्रहरी प्रमुख प्रहरी उपरीक्षक गंगा पन्तले घटनाको बिषयमा विस्तृत अनुसन्धान भइरहेको जानकारी दिइन् । घटनापछि सामाजिक सद्भाव नै विथोलिने हो कि भन्ने चिन्ता बढेको वडा अध्यक्ष गुप्ताले बताएका छन् ।

तीन जना मुस्लिम समुदायका व्यक्तिमा कोरोना भाइरसको संक्रमण भएलगत्तै मस्जिद र मदरसा अनुगमनका लागि अनुरोध गर्दा प्रशासनले वेवास्ता गर्दा शनिबारको घटना भएको उनको आरोप छ ।

के हो विवादको जड ?

कोरोना भाइरसको जोखिम बढेपछि सरकारले सामुहिक रुपमा भेला हुन प्रतिबन्ध लगाउँदा लगाउँदै पनि मौजेटोलको मस्जिदमा सामुहिक नमाज पढ्ने क्रम रोकिएको थिएन ।

सरकारले लकडाउन गर्दा पनि प्रतिबन्धलाई उल्लंघन गर्दै सामुहिक नमाज पढ्न बाहिरका मानिस समेत भेला भएपछि कोरोनाको जोखिम बढ्न सक्ने भन्दै स्थानीयवासी आक्रोशित थिए ।

अर्कातर्फ नमाज पढ्न हिन्दू समुदायका व्यक्तिले प्रहरीप्रशासनलाई सुराकी गरेर अवरोध खडा गरेको भन्दै मुसलमान समुदायका व्यक्तिहरु पनि रिसाएका थिए ।

दुई साताअघि पनि सामुहिक नमाज पढ्न खोज्नेलाई  बहुअर्वाभाट्टाको प्रहरी टोलीले सामुहिक भीडभाड नगर्न चेतावनी दिदै मस्जिद नै खाली गराएको थियो । तर पनि नमाज पढ्न भेला हुने क्रम नरोकिएपछि शनिबार स्थानीयले प्रहरीलाई जानकारी दिएलगत्तै स्थानीयमाथि नै हमला भएको थियो ।

मौजेटोल मस्जिद आसपास करिब २ सय मुस्लिम समुदायको घर छ। त्यहाँ ५० घर मात्र हिन्दू परिवार छन् ।