काठमाडौं– प्रतिनिधिसभा बैठक के हुने भन्ने अन्योल देखिएको छ ।
चैत्र सात अर्थात भोलिका लागि बोलाइएको बैठक र त्यसपछिका अन्य बैठकहरु के गर्ने भन्ने विषयमा सभामुख अग्निप्रसाद सापकोटाले छलफल शुरु गरेका छन् ।
कोरोना भाइरसको संक्रमण विश्वभर फैलदै गएको र नेपालले पनि उच्च सतर्कता अपनाउनु पर्ने आवाज यसअघि नै सांसदहरुले संसद बैठकमा राख्दै आएका थिए ।
सरकारले समेत धेरै भीडभाड युक्त क्षेत्रमा नजान आह्वान गरिसकेको अवस्थामा संसद बैठक के गर्ने भनेर सभामुख सापकोटा छलफलमा जुटेका हुन् ।
‘सभामुखले संसद बैठकलाई के गर्ने भन्ने विषयमा छलफल गरिरहनु भएको छ’ सभामुख सापकोटाका सञ्चार विज्ञ श्रीधर न्यौपानेले भने,‘उहाँले राजनीतिक दलका प्रमुख सचेतक, सचेतक तथा विभिन्न समितिका सभापति, संसद सचिवालयसँगको छलफल पछि के गर्ने भन्ने निर्णय गर्नुहुनेछ ।’
संसद सचिवालय स्रोतका अनुसार भोलिको बैठक सूचना टाँस गरेर स्थगित हुने सम्भावना रहेको छ ।
कोभिड–१९ संक्रमण, रोकथाम तथा नियन्त्रण उच्चस्तरीय समन्वय समितिको बुधवार बसेको बैठकले २५ जना भन्दा धेरै भेला हुन नपाउने निर्णय गरेको थियो ।
त्यस्तै बैठकले सिनेमा हल, रेस्टुरेन्ट, स्वीमिङपुल, स्कुल, कलेज लगायत धेरै मानिस भेला हुने स्थानहरु बन्द गरेसँगै प्रतिनिधिसभा बैठक के हुने भन्ने प्रश्न उव्जिएको छ ।
प्रतिनिधिसभामा सबै सदस्य उपस्थित हुने हो भने २७५ हुन जान्छन् ।
प्रतिक्रिया