मुम्बई – फिल्म ‘कबीर सिंह’ को सफलतापछि शाहिद कपूरलाई ठूला प्रोजेक्टका फिल्मबाट अफर आइरहेको छ ।

यतिबेला उनी शंशाक खेतानले निर्देशन गर्ने फिल्म ‘योद्धा’ का कारण चर्चामा छन । उक्त फिल्म करण जोहरले निर्माण गर्ने भएका छन् ।

खबरका अनुसार फिल्मको शीर्ष भूमिकामा महिला कलाकारको खोजी भइरहेको थियो । अब त्यो पूरा भएको छ । फिल्ममा दिशा पटानीले अभिनय गर्ने फाइनल भएको बताइएको छ ।

‘योद्धा’ मा शीर्ष भूमिकामा शाहिद कपूरले पनि अभिनय गर्ने भएका छन् । फिल्ममा शाहिद र दिशाको जोडी देख्न सकिनेछ । यी दुवैले फिल्ममा योद्धाको भूमिका निभाउनेछन् । र, दमदार एक्सन दिनेछन् ।

फिल्म निर्माण टिमले छिट्टै नै फिल्मको आधिकारिक घोषणा गर्ने जनाइएको छ । फिल्मको छायांकन अर्को वर्षबाट थालिने जनाइएको छ ।