काठमाडौँ- सर्वोच्च अदालतमा १९ सदस्यीय पूर्ण इजलास बस्दैछ ।

कोरोना भाइरसको संक्रमण नियन्त्रण गर्न सरकारले घोषणा गरेको लकडाउनका कारण मुद्दामा परेको असरको समाधान गर्न आज सर्वोच्च अदालतमा ऐतिहासिक १९ सदस्यीय वृहत पूर्ण इजलास बस्दैछ।

प्रधान न्यायाधीश चोलेन्द्र शम्शेर जबराको अध्यक्षतामा कोरोना भाइरसको कारण मुद्दामा देखिएका बाधा अड्चन फुकाउन इजलास तोकिएको र सोबाट देखिएका मुद्दाका तारेख, म्याद लगायतका अडचनको बाधा फुकाउने अपेक्षा गरिएको छ।

सर्वोच्च अदालत आफैंले दायर गरेको मुद्दा समेत सो सुनुवाइमा पेश भएको छ।

सम्भवतः तुंग शम्शेर राणाको मुद्धापछि सर्वोच्चका सबै न्यायाधीशहरु बसेर निर्णय गर्न लागिएको यो पहिलो पटक हो।

कानुनविद्हरुका अनुसार, २०२१ सालमा तुंग शम्शेर राणाको इण्डियन एअरलाइन्ससँगको क्षतिपूर्तिको मुद्दापछि पछिल्लो समय सबै न्यायाधीशहरुको इजलास बसेको यो पहिलो पटक हो।