काठमाडौं- पशुपतिनाथको मन्दिरमा भजनकीर्तन गर्न भेला भएकामाथि प्रहरीले धरपकड गरेको छ ।
पशुपतिनाथको मन्दिर खोल्न शान्तिपूर्ण दवाब दिने उद्देश्यले बिहीबार उनीहरु पशुपति परिसर बाहिर भुवनेश्वरी चोकमा भजन गाउने तयारी गर्दा-गर्दै प्रहरीले धरपकड गरेको हो ।
जम्मा भएकाहरुले भजनकीर्तन गर्ने तयारी गर्दै गर्दा प्रहरीले धरपकड गर्यो, हामीहरुको माइक खोस्यो’, पशुपतिका केदारमान भण्डारीले भने ।
माइक खोसेपछि प्रहरीले अन्धधुन्ध लाठी प्रहार गरेको उनले बताए ।
गौशाला, चाबहिल, जयबागेश्वरी, गुहेश्वरी लगायतका नाकामा बसेर प्रहरीले पशुपति आउन रोकेको थियो ।
धार्मिक स्थल पनि सुरक्षाका सबै मापदण्ड पूरा गरेर खोल्नुपर्ने धार्मिक संघसंस्थाका पदाधिकारीले माग गरेका छन् ।
मन्दिर खोल्न माग गर्दै राष्ट्रपति विद्यादेखि भण्डारी पशुपति क्षेत्र विकास कोष, संस्कृति, पर्यटन तथा नागरिक उड्ययन मन्त्री योगेश भट्टराईलाई समेत भेटेर ज्ञापन पत्र समेत दिइसकेका छन् ।
शिवसेना नेपाल, हिन्दुजागर नेपाल, विश्वहिन्दु महासंघ, विश्वहिन्दु युवा संघ अन्तराष्ट्रिय समितले मन्दिर विहिबारबाटै खोल्न माग राख्दै मन्त्री भट्टराइलाई ज्ञापन पत्र बुझाएका थिए ।
पशुपतिनाथको मन्दिर ५ दिनभित्र नखोले आन्दोलन गर्ने चेतावनी धार्मिक संघ संस्थाले दिएका छन् ।
शिवसेना, नेपाल, हिन्दु जागरण नेपाल, विश्वहिन्दु महासँग लगायत २१ वटा धार्मिक संगठनको बिहिबारको बैठकले यस्तो चेतावनी दिएका हुन् ।
कोरोनाको महामारीले ०७६ चैत १० गतेदेखि लकडाउन भएसँगै पशुपतिनाथ लगायत मठ मन्दिरमा दर्शन गर्न बन्द गरिएका छन् ।
पशुपतिनाथमा नित्य पुजा भने भइरहेको छ । मन्दिर नखुल्दा भक्तजनहरु गेट बारिबाटै दर्शन गरेर फर्कने गरेका छन् ।
प्रतिक्रिया