काठमाडौं- स्वास्थ्य तथा जनसङ्ख्या मन्त्रालयले कोभिड- १९ को रोकथाम र उपचारमा संलग्न स्वास्थ्यकर्मी र सुरक्षाकर्मीको पनि कोरोनाभाइरस परीक्षण गर्ने भएको छ।

मन्त्रालयले सूचना जारी गर्दै कोभिड- १९ को उपचार, निदान, नियन्त्रण अभियानमा खटिएका स्वास्थ्यकर्मी र सुरक्षाकर्मीको पनि र्‍यापिड डाइनोष्टिक टेष्ट (आरडीटी)बाट परीक्षण गरिने मन्त्रालयका प्रवक्ता डा विकास देवकोटाले जानकारी दिए।

यस्तै चैत महिनाभित्र विदेशबाट आएका सबैको आरडिटीबाट कोभिड- १९ को समेत परीक्षण गरिने भएको छ। मन्त्रालयले १४ दिनभन्दा बढी क्वारेन्टाइनमा बसेका सबैको पनि परीक्षण गर्ने सूचनामा जनाएको छ।

नेपाल कोभिड- १९ को जोखिममा रहेको भन्दै गत चैत ११ गतेबाट बन्दाबन्दी गरिएको छ। अहिलेसम्म नेपालमा १६ जनामा कोभिड- १९ सङ्क्रमण देखिएको छ। नेपाल कोभिड- १९ को दोस्रो चरणमा प्रवेश गरेको छ। सम्भावित सङ्क्रमण बढ्न नदिन सरकारले यही वैशाख १५ गतेसम्म लकडाउन कायम राखेको छ।