दैलेख– भारतीय प्रहरीको एक टोली नेपाली प्रशासनको अनुमति विनै पोषाक नै लगाएर दैलख पुगेको छ ।

भारतीय प्रहरीका ३ जना कर्मचारी बिहान पोसाकसहित दैलेख बजारमा देखिएपछि स्थानीयले विरोध जनाएका थिए ।

भारतीय राज्य हरियाणा राज्यको यमुनानगर जिल्लाबाट सब इन्सपेक्टर (सई) विजय विवेकको नेतृत्वमा ३ जना प्रहरी कर्मचारी र १ जना अर्का व्यक्ति गरी ४ जना सोमबार साँझ दैलेख पुगेका थिए ।

स्थानीय प्रशासनलाई जानकारी नै नगराई मंगलबार बिहान पोषाक लगाएरै दैलेख बजारमा हिँडिरहेको देखेपछि स्थानीयले विरोध जनाएका थिए ।

स्थानीयको विरोध पछि उनीहरुले जिल्ला प्रहरी कार्यालय दैलेखको सम्पर्कमा पुगेका थिए । जिल्ला प्रहरी कार्यालय दैलेखकका निमित्त कार्यालय प्रमुख प्रहरी निरीक्षक (इन्सपेक्टर) नैनबहादुर सावदले भारतीय प्रहरीलाई पोषाक लगाएर नहिँड्न भनेको बताए ।

दैलेख प्रहरीका अनुसार उनीहरु कामका लागि भारत गएका दैलेखका एक युवक ५० लाख रुपैयाँ चोरी गरेर भागेको सूचना प्राप्त भएपछि खोजीका लागि दैलेखसम्म आइपुगेका हुन् ।

जिल्ला प्रहरी कार्यालयमा पुग्दा उनीहरुले अर्को देशमा पुग्दा पोषाक लगाउनु हुँदैन भन्ने थाहा नपाएको भन्ने बयान दिएका बुझिएको छ ।