काठमाडौँ- उद्योग वाणिज्य तथा आपूर्तिमन्त्री लेखराज भट्ट बुधबार  बजार अनुगमनमा निस्किए ।

कोरोना भाइरस (कोभिड १९) को कारणले दैनिक उपभोग्य पदार्थको मूल्यवृद्धि गरेपछि उनी आफैँ काठमाडौँ उपत्यकाका विभिन्न ठाउँमा बुधबार ग्राहक बनेर बजारमा पुगे ।

झण्डाबिनाको गाडीमा सवार भएका मन्त्री भट्ट कालीमाटी, बल्खु र लगनखेल क्षेत्रका तरकारी पसलमा पुग्दा कसैले चिनेनन् । त्यसक्रममा उनले २० केजी प्याज किने त्यो पनि प्रचलित मूल्यभन्दा बढीमा ।

मन्त्री आफैँ ठगिएपछि उनले तत्काल स्थानीय प्रशासनलाई फोन गरी बढी मूल्य लिने थोक पसलेलाई कारबाही गर्न निर्देशन दिए ।

वाणिज्य विभागले बढी मूल्यमा प्याज विक्री गर्ने पसललाई कारवाहीको प्रक्रिया समेत अगाडि बढाइसकेको छ ।

अहिले भारतबाट प्याज निर्यात नभएपछि व्यापारीले दोब्बरमूल्यमा प्याज बिक्री गरिरहेका छन् । चाडपर्व नजिकिदै गर्दा तरकारी, खाद्यपदार्थको मूल्य बढेको छ ।

मन्त्री भट्टलाई बिहानै उपभोक्ताले प्याजको मूल्य एक्कासी बढेको गुनासो गरेपछि मन्त्री भट्ट बिहानै बजारको माहोल बुझ्न निस्किएको स्वकीय सचिव हितेश ओझाले जानकारी दिए ।

आफैँ ठगिएपछि मन्त्री भट्टले बजार अनुगमनलाई तीब्र पार्न पनि सम्बन्धित निकालाई निर्देशन दिएका छन् ।