बागलुङ- बागलुङकी कोरोना संक्रमित ६५ वर्षीया महिलाको तेस्रो पटकको स्वाब परीक्षणमा रिपोर्ट ‘नेगेटिभ’ आएको छ ।

नेपालको छैटौं कोरोना संक्रमित ती महिलाको तेस्रो पटकको स्वाब परीक्षण रिपोर्ट नेगेटिभ आएको धौलागिरी अञ्चल अस्पताल बागलुङले जनाएको हो ।

पोखरामा तेस्रो पटक गरिएको परीक्षणमा कोरोना संक्रमण निको भएको अर्थात ‘नेगेटिभ’ आएको धौलागिरी अञ्चल अस्पतालका मेडिकल सुपरिटेन्डेन्ट डा. शैलेन्द्र पोखरेलले बताए ।

६५ वर्षीया महिलाको यसअघि गरिएको दोस्रो स्वाब परीक्षण रिपोर्ट भने पोजिटिभ आएको थियो। अब पुनः शुक्रबार महिलाको स्वाब परीक्षणका लागि पोखरा पठाइनेछ।

चौथो पटक पनि कोरोना निको भएको नेगेटिभ रिपोर्ट आएमा ती महिलालाई डिस्चार्ज गरिने अस्पतालले जनाएको छ । उनी गत चैत ४ गते बेल्जियमबाट कतारको दोहा हुँदै नेपाल आएकी थिइन ।

नेपालको पाँचौ संक्रमित तथा बागलुङकी पहिलो संक्रमित १९ वर्षीया युवतीको भने चौथो रिपोर्ट पनि पोजिटिभ आएको छ। उनको पनि पुनः स्वाब परीक्षणका लागि पठाइने डा.पोखरेलले बताए।