काठमाडौं- प्रहरीले २२ लाख भन्दा बढी मूल्य बराबरकाे सुन सहित एक जना भारतीय नागरिकलाई पक्राउ गरेको छ ।

महानगरीय प्रहरी प्रभाग नागढुंगा तथा महानगरीय प्रहरी वृत्त थानकोटबाट खटिएका प्रहरीले टोलिले चन्द्रागिरि न.पा.वडा न २ नागढुंगा चेकजाँचका क्रममा उनलाई पक्राउ गरेको हो ।

महानगरीय प्रहरी बृत्त थानकोटका डीएसपी घनश्याम श्रेष्ठले ना १ ज ५०६० नम्बरको टाटासुमो गाडीलाई रोकी चेक जाँच गर्ने क्रममा भारतको मेन्दीपुर जिल्ला कलकत्ता दासपुर थाना घर भएका  ४५ वर्षीय आशुतोष सेनापतीलाई पक्राउ गरेको हो ।

उनको शरीर तथा सामान खानतलासी गर्ने क्रममा बिल तथा कागजात नभएको ३९८ ग्राम सुन फेला परेको प्रहरीले जनाएको छ । बरामद गरीएको सुनमा केही तयारी अवस्थाका गरगहना र २ थान सुनका पाता समेत रहेको डीएसपी श्रेष्ठले बताए ।

बरामद गरीएको सुन तथा पक्राउ परेका मानिसलाई आवश्यक अनुसन्धानको लागि राजश्व अनुसन्धान विभाग हरिहरभवन ललितपुर पठाइएको थानकोट प्रहरीले जनाएको छ ।

बरामद गरिएको सुनको बजार मुल्य अनुमानित बाईस लाख तेईस हजार रहेको प्रहरीले जनाएकाे छ ।