गौर–नेपाल कम्युनिष्ट पार्टी प्रदेश नम्बर २ का अध्यक्ष प्रभु साहले हुलाकी लोकमार्गको सडकसीमा १२ मिटर कुनै पनि हालतमा स्वीकार्य नहुने बताएका छन् ।

विहिबार रौतहटको यमुनामाई गाउँपालिका-५, झुन्खुनवामा गाउँपालिका उपाध्यक्ष गीतादेवी साहको अध्यक्षतामा भएको कार्यक्रमलाई सम्बोधन गर्दै अध्यक्ष साहले १२ मिटरमा बनाएको सडकको कुनै अर्थ नरहेको जीकिर गरे ।

अध्यक्ष साहले भने, “वर्षौंदेखि पछाडि परेको मधेशलाई आर्थिक, व्यवसायिक र व्यापारिक रुपमा माथी उठाउने एक मात्र विकल्प हुलाकी लोकमार्ग हो। भन्नुपर्दा खेरी हुलाकी सडक मधेशको विकासको मेरुदण्ड हो । तर बिडम्बना यो सडकको सीमा १२ मिटरमा सिमित गरिएको छ । यो हामीलाई कदापी स्वीकार्य छैन ।”

१२ मीटर सडकसीमा राखेर बनाइएको हुलाकी सडक मधेशी जनतालाई ठग्ने काम मात्र भएको भन्दै अध्यक्ष साहले भने, ” कुनै जमाना थियो त्यतीबेला कम जनसंख्या, कम गाडी, कम बस्ती हुँदा राजमार्गहरु ५० मिटर सडकसीमा राखेर बनाइयो । तर हिजोको अनुपातमा आज सबैथोक बढ्दा पनि १२ मिटर राख्नु भनेको अदुर्दर्शिताको पराकाष्ठा हो । सानो बच्चालाई चकलेट दिएर फकाएझैँ मधेशी जनता ठग्ने काम मात्र भएको छ । सडकसीमा कम्तीमा ५० मिटर नपुर्‍याउने हो भने हुलाकी सडक नबनाए पनि हुन्छ ।”

कार्यक्रममा प्रदेश सभा सांसद कुन्दन कुश्वाहा तथा नागेन्द्र यादव, मौलापुर नगरपालिकाकी मेयर रिना कुमारी साह, कटहरिया नगरपालिकाका मेयर सियाराम कुश्वाहा, इशनाथ नगरपालिकाका मेयर सन्तोष मेहता, चन्द्रपुर नगरपालिकाकी उपमेयर रामरती चौधरी, फतुवा विजयपुर नगरपालिकाकी उपमेयर कान्तिदेवी साह, देवाही गोनाही नगरपालिकाकी उपमेयर परनिया देवी, पूर्वसांसद अबदुल कलाम अजाद, कटहरियाका नसरुद्दिन अन्सारी, नेकपा नेताहरु राजकिशोर यादव, योगेन्द्र साहलगायतको उपस्थिति रहेको थियो ।