काठमाडौं- सडक डिभिजन कार्यालय दाङका प्रमुख (सिडिई) जीतेन्द्रकुमार चौधरीले कार्यालय समयमा आफूमाथि दुर्व्यवहार भएको भन्दै न्यायका लागि आग्रह गरेका छन् ।

चौधरीले गत पुस २७ गते कार्यालयको काम गरिरहेको अवस्थामा सेवाग्राहीको रूपमा आठजना अपरिचित व्यक्ति कार्यकक्षमा आइ ढोका बन्द गरी अमानवीय एवं अभद्र व्यवहार गरेको भन्दै घटनामा संलग्नलाई कारवाहीको माग गरेका हुन् ।

उनले भने, “ममाथि कार्यालय समयमा काम गरिरहेको बेलामा जुन किसिमको दुर्व्यवहार भएको छ, सो कार्यमा संलग्न सबैको पहिचान गरी कारवाही अगाडि बढाउन स्थानीय प्रशासनसँग जोडदार माग गर्दछु ।”

आफूमाथि कमिशन खाएको झुटोे, भ्रामक र कपोलकल्पित आरोप लगाएर दुर्व्यवहार गरिएको भन्दै कार्यालय प्रमुख चौधरीले विज्ञप्ति जारी गर्दै त्यसको खण्डनसमेत गरेका थिए ।