मुम्बई – बलिउड अभिनेत्री करीना कपूर खानले ‘लाल सिंह चड्ढा’ को छायांकन सकेकी छिन् ।

गर्भवती अवस्थामा रहेकी करीनाले कोरोना महामारीका बीच फिल्मको छायांकन पूरा गरेकी हुन् । फिल्ममा आमिर खानको पनि शीर्ष भूमिका रहने छ ।

करीनाले सामाजिक सञ्जालमार्फत फिल्मको छायांकन सकिएको र मुस्किल समय भए पनि शूटिङ सकिएको बताएकी छिन् ।

‘हरेक यात्राको एक अन्त्य हुन्छ, आज मैले आफ्नो फिल्म लालसिंह चड्ढाको शूटिङ पूरा गरें, मुस्किल समय… महामारी, प्रेग्रेन्सी र नर्भसनेस तर जुन इच्छाले हामीले शूटिङ गर्‍यौं, त्यसलाई कसैले रोक्न सकेन,’ उनले भनेकी छिन् ।

आमिर खानको फिल्म ‘लाल सिंह चड्ढा’ लाई अद्वैत चन्दनले निर्देशन गरिरहेका छन् । यो फिल्म हलिउड फिल्म ‘फरेस्ट गम्प’ को हिन्दी रिमेक हो ।

फिल्मको बाँकी छायांकन भारतको दिल्लीमा भइरहेको छ ।