काठमाडौँ– अखिल नेपाल फुटबल संघ (एन्फा) ले सुरु गरेको ग्रासरुट फुटबल कार्यक्रम एसियन फुटबल संघ (एएफसी) को मूल्याङ्कनमा पहिलो पटक परेको छ ।

पछिल्लो २ वर्षमा नेपाली फुटबलको ग्रासरुट कार्यक्रमले हात पारेको सफलतालाई हेरेर एएफसीले ब्राउन्ज स्तरको मूल्याङकनमा राखेको हो ।

एएफसीले गोल्ड, सिल्भर र ब्राउन्ज गरी ग्रासरुट कार्यक्रमलाई मूल्याङ्कन गर्ने गरेको छ । जसमा नेपाल पहिलो पटक मुल्याङ्कनमा परेको हो ।

एन्फाले ६ वर्षदेखि १२वर्ष उमेरसमुहका बालबालिकालाई यो कार्यक्रममा सहभागि गराउने गरेको छ । काठमाडौं लगायत देशका ४५ वटा सदस्य जिल्लामा एन्फाले ग्रासरुट कार्यक्रम संचालन गर्दै आएको छ ।

एन्फाले बालबालिकाहरुलाई खेलकुदमा आर्कषण बढाउने उदेश्यसहित यो कार्यक्रम २०१८ बाट सुरु गरेको हो ।

एन्फाले सामूहीक रुपमा बालबालिकाहरुलाई जम्मा गराएर फुटबल खेलइरहेको छ । काठमाडौंमा एन्फा कम्प्लेक्स सातदोबाटोमा हरेक शनिबार ग्रासरुट कार्यक्रम अन्तर्गत बालबालिकाहरु अभ्यासका लागि आउने गरेका थिए । तर, नोबेल कोरोना भाइरस (कोभिड १९) का कारण अहिले त्यो स्थगित भएको छ ।