काठमाडौं – नेपाली कलाकारहरुले नेपाल विद्युत प्राधिकरणको कार्यकारी निर्देशकमा कुलमान घिसिङ पुनः दोहोरिनुपर्ने माग गरेका छन् ।

सामाजिक सञ्जालमार्फत ऐक्यवद्धता जनाउँदै कलाकारहरुले कुलमान घिसिङलाई पुनःनियुक्तिका लागि दबाब दिन हरेक दिन बेलुका ८ बजेदेखि ५ मिनेटसम्मका लागि बत्ती निभाउन अनुरोध गरेका छन् ।

‘आदरणीय साथीहरु, कुलमानजीको पुनः नियुक्तिका लागि जनदबाव स्वरुप आजबाट हरेक साँझ ८ बजे ५ मिनेट बत्ती निभाएर ऐक्यवद्धता प्रकट गरौं,’ कलाकार दीपकराज गिरीले सामाजिक सञ्जालमार्फत अपील गरेका छन् ।

यस्तै फिल्म निर्देशक प्रदीप भट्टराईले पनि गिरीको कुरामा ऐक्यवद्धता जनाउँदै बत्ती निभाएर दबाव दिन आह्वान गरेका छन् ।

भट्टराई भन्छन्, ‘नराम्रा पटक–पटक, राम्रा किन एकपटक ?’

कुलमान घिसिङको पुनःनियुक्ति हुनुपर्ने धारणा अन्य कलाकारले पनि व्यक्त गरेका छन् ।

कलाकार हरिवंश आचार्य, करिश्मा मानन्धर, वर्षा राउत, केकी अधिकारी लगायतका कलाकारले पनि कुलमान पुनः कार्यकारी निर्देशकमा नियुक्ति हुनुपर्ने भन्दै आवाज उठाएका छन् ।

आफ्नो ४ वर्षे कार्यकालमा कुलमानले नेपालमा दैनिक घण्टौंसम्म हुने लोडसेडिङ अन्त्य गरेका थिए । विद्युत चुहावट रोकी लोडसेडिङ अन्त्य गरेको भन्दै उनको खुबै तारिफ भएको थियो ।

लामो समयदेखि सामाजिक सञ्जालमा कुलमान घिसिङको पुनःनियुक्ति हुनुपर्ने विषय उठेको छ । धेरै मानिसले कुलमानलाई पुनः नियुक्ति गर्नुपर्ने आवाज उठाएका छन् ।

सोमवार बसेको मन्त्रिपरिषद बैठकले भने कुलमान घिसिङलाई पुनःनियुक्ति गर्नेबारे निर्णय गर्न सकेन । प्रधानमन्त्री केपी शर्मा ओलीले कुलमानलाई पुनःनियुक्ति गर्नुपर्ने विषयमा कानूनी प्रश्न उठाएको बताइएको छ ।