काठमाडौं– नेपाल कोरियामैत्री नगरपालिका अस्पतालमा कार्यारत स्वास्थ्यकर्मीमा पनि कोरोना पुष्टि भएको छ ।

अस्पतालमा मेडिकल डाइरेक्टर डाक्टर दिपेन्द्रकुमार रौसनका अनुसार अस्पतालमा कार्यरत ३ जना नर्स र अर्का एकजना हेल्परसहित ४ जनामा कोरोना संक्रमण पुष्टि भएको हो ।

संक्रमित ३ जना नर्सको उमेर क्रमशः २२,२६ र २८ वर्ष र हेल्पर पुरुष २१ वर्षका हुन् ।

उनीहरु ४ जनालाई नै सोही अस्पतालमा आइसोलेसन व्यवस्थापन गरी राखिएको डा रौसनले बताए ।

उनका अनुसार अस्पतालमा नर्स तथा कर्मचारीमा कोरोना पुष्टि भएसँगै अस्पतालमा कार्यरत अन्य डाक्टर तथा कर्मचारीको पनि कोरोना परीक्षण गर्न लागिएको छ ।

‘हाम्रो अस्पतालमा ३ जना नर्स र एकजना हेल्परसहित ४ जनामा कोरोना देखियो,‘ डा रौसनले खबरहबसँग भने, ‘उहाँहरु ४ जना नै हाम्रै अस्पतालमा आइसोलेसनमा हुनुहुन्छ, अस्पतालमा डाक्टर, नर्स, स्वास्थ्यकर्मीसहित करिब ३ सय जना कर्मचारी छन् । सबैको कोरोना परीक्षण गर्ने तयारी गरेका छौं ।’