साना– यमनमा युद्धरत हुथी विद्रोहीले ‘दुश्मनको’ टोर्नेडो लडाकु विमान खसालेको दाबी गरेको छ ।

हुथी विद्रोहीद्वारा सञ्चालित अल मशिरा टेलिभिजनमा सम्बोधन गर्दै हुथी विद्रोहीका प्रवक्ता याहाया सारीले यमनको अल–जफ प्रान्तमा लडाकु विमान खसालेको दाबी गरेका हुन् ।

उनले उक्त लडाकु विमानलाई जमिनबाट आकाशमा मार हान्न सक्ने अत्याधुनिक क्षेप्यास्त्रले खसालेको समेत जनाए ।
यसक्रममा कुनै हताहती भए नभएकोबारे भने खुलाइएको छैन ।

यमनमा इरान समर्थित हुथी विद्रोहीविरुद्ध कारवाही गर्दै आएको साउदी अरब नेतृत्वको गठबन्धनले भने हुथी विद्रोहीको दाबीबारे कुनै टिप्पणी गरिसकेको छैन । सन् २०१४ मा हुथी विद्रोहीले राजधानी सानासहित मुलुकको ठूलो भूभाग कब्जा गरेयता यमन गृहयुद्धमा फसेको छ ।

सन् २०१५ मा साउदी अरबले हुथी विद्रोहलाई परास्त गर्न हवाई कारवाही थालेपछि त्यहाँको अवस्था अझ खराब बन्दै गएको छ । यमनमा जारी युद्धमा दशौं हजारले ज्यान गुमाइसकेका छन् भने अरु लाखौं यमनीहरुले मानवीय संकटको समाधान गरिरहेका छन् ।