काठमाडौँ– सेवाग्राहीको सहजताका लागि वाणिज्य,आपूर्ति तथा उपभोक्ता संरक्षण विभाग परिसरमै बैंकिङ काउन्टर सेवा सुचारु गरिएको छ ।

सेवाग्राहीलाई राजस्व बुझाउन सहजताको लागि विभाग र सिभिल बैंकको सहकार्यमा सोमबारबाट विभाग परिसरमै बैंकिङ काउन्टर सेवा सुचारु गरिएको हो ।

बै‌किङ सेवा सुचारुसँगै विभागमा राजस्व बुझाउन आएका सेवाग्राहीहरु अन्य बैंकमा जानुपर्ने समस्याबाट मुक्त हुने विभागले विश्वास लिएको छ ।

आज विभागका महानिर्देशक नेत्रप्रसाद सुवेदी र सिभिल बैंकका भोलाबहादुर श्रेष्ठले संयुक्त रूपमा काउन्टरको सुरुवात गरेका हुन् ।

सिभिल बैंकको काउन्टर सुचारु गरिएसँगै सरकारी र निजी क्षेत्रकाे सहकार्यबाट सेवा प्रवाहमा थप सहजता भएको विभागका निर्देशक तथा प्रवक्ता शिवराज सेढाईंले जानकारी दिए ।

अहिले बैंकबाट राजस्व बुझ्ने काम गरिरहेको भए पनि अझ स्तरीकरण गरी सेवाग्राहीहरुको थप सहजताका लागि ‘इबैं‌किङ’ सेवा समेत प्रदान गर्ने विभागको योजना रहेको उनले बताए ।

यसअघि विभागले कोरोना महामारीको विषम परिस्थितिलाई मध्यनजर गर्दै गत भदौदेखि व्यापारिक फर्म दर्ताको काम समेत अनलाइनबाट गर्ने सुविधा प्रदान गरेको थियो ।