काठमाडौं– काठमाडौं उपत्यकामा मात्र ६ हजार ४४४ जना सक्रिय कोरोना संक्रमित रहेको पाइएको छ ।

स्वास्थ्य तथा जनसंख्या मन्त्रालयका अनुसार सोमबारसम्म काठमाडौं उपत्यकका तीन जिल्ला काठमाडौं, भक्तपुर र ललितपुरमा गरी ६ हजार ४४४ जना सक्रिय संक्रमित छन् ।

ती मध्ये सबैभन्दा धेरै काठमाडौंमा छन् । मन्त्रालयको तथ्यांकका अनुसार काठमाडौंमा मात्र ५ हजार ४४६ जना सक्रिय संक्रमित रहेका छन् । यस्तै भक्तपुरमा ५०१ जना र ललितपुरमा ४९७ जना सक्रिय संक्रमित छन् ।

तीनै जिल्लामा हालसम्म १२ हजार २५० जनामा कोरोना पुष्टि भएको स्वास्थ्य मन्त्रालयले जनाएको छ । ती मध्ये काठमाडौंका मात्र १० हजार २८ जना, भक्तपुरका १ हजार ३२ जना र ललितपुरका १ हजार १९० जना रहेका छन् ।

ती संक्रमित मध्ये तीनै जिल्लाामा हालसम्म ५ हजार ७२२ जनाले कोरोना जितिसकेका छन् । स्वास्थ्य मन्त्रालयको तथ्यांक अनुसार कोरोना संक्रमण जित्नेहरुमा पनि काठमाडौंका ४ हजार ५२०, भक्तपुरका ५१८ र ललितपुरका ६८४ जना रहेका छन् ।

काठमाडौं उपत्यकामा हालसम्म ८४ जना कोरोना संक्रमितको मृत्यु भइसकेको छ । मृत्यु हुनेमा काठमाडौंका ६२ जना, भक्तपुरका १३ जना र ललितपुरका ९ जना रहेका छन् ।

नयँ थपिएका संक्रमित मध्ये उपत्यकाका मात्रै ४३ प्रतिशत

स्वास्थ्य मन्त्रालयका अनुसार सोमबार देशभर १ हजार १७० जनामा कोरोना पुष्टि भएको छ । त्यो मध्ये काठमाडौं उपत्यकाका तीन जिल्लामा मात्र ५१२ जना रहेका छन् । जसमा काठमाडौंका ४४०, भक्तपुरका ४३ र ललितपुरका २९ जनामा कोरोना पुष्टि भएको छ ।

यो तथ्यांकलाई हेर्दा देशभरको नयाँ थपिएका संक्रमित मध्ये उपत्यकामा मात्रै ४३.७६ प्रतिशत हो ।

उपत्यकाका अस्पतालमा १ हजार ८४३ जना संक्रमित

स्वास्थ्य तथा जनसंख्या मन्त्रालयका अनुसार काठमाडौं उपत्यकाका विभिन्न अस्पतालहरुमा १ हजार ८४३ जना कोरोना संक्रमित उपचारत छन् ।

ती मध्ये १७५ जना सोमबार नै अस्पताल भर्ना भएका तथा कोरोना पुष्टि भएका नयाँ संक्रमित हुन् ।

उपत्यकाका २१ वटा अस्पतालहरुमा १ हजार ७१० जना आइसोलेसनमा रहेका छन् । यस्तै १०८ जना आईसीयु र २५ जना संक्रमित उपत्यकामै भेन्टिलेटरमा उपचाररत रहेका छन् ।