काठमाडौं – नेपाली कांग्रेस नेता डा. शेखर कोइरालाले श्रीरामको जन्मस्थान सम्बन्धी प्रधानमन्त्री केपी शर्मा ओलीको अभिव्यक्तिले भारतसँगको कूटनीतिक सम्बन्ध खलबल्याउन सक्ने बताएका छन् ।

ओलीले मंगलबार भारतले नक्कली अयोध्या खडा गरेर सांस्कृतिक तथ्यमाथि अतिक्रमण गरेको बताएपछि सामाजिक सञ्जालमार्फत कोइरालाले  ओलीको उक्त अभिव्यक्तिपछि दुई देशका जनताको धार्मिक र सांस्कृतिक सम्बन्ध पनि बिगार्ने काम भएको बताएका छन् ।

‘प्रधानमन्त्रीले अयोध्याको बारेमा अप्रमाणित, विवादास्पद र गैरजिम्मेवार अभिव्यक्ति दिएर दुई देशको कूटनीति खल्बल्याउने मात्रै नभई नेपाली र भारतीय जनताबीचको आपसी धार्मिक र सांस्कृतिक सम्बन्ध बिगार्ने काम गरेका छन्’ कोइरालाले सामाजिक सञ्जालमा लेखेका छन् ।

धर्म र आस्थालाई राजनीति तथा कूटनीतिको हतियार बनाएर सत्ताको मलजल गर्नु कदापी सह्य नहुने उनको भनाइ छ ।