काठमाडौं- त्रिवि शिक्षण अस्पतालका स्वास्थ्यकर्मीको कोरोना परीक्षण सुरु भएको छ ।

अस्‍पतालमा उपचाररत एक ६ वर्षीया बालिकामा कोरोना भाइरस संक्रमण पुष्ट भएपछि अस्पतालमा कार्यरत डाक्टर, नर्स तथा अन्य स्वास्थ्यकर्मीको थ्रोटस्वाव संकलन भइरहेको अस्पतालका कोरोना व्यवस्थापन समितिका संयोजक डा सन्तकुमार दासले जानकारी दिए ।

अहिलेसम्म ५० जनाको नमूना संकलन गरिएको जानकारी दिँदै कोरोना संक्रमित बालिकाको सम्पर्कमा रहेका ७८ जनाको पीसीआर विधिबाट कोरोना परीक्षणको नमूना संकलन गरिने बताए ।

बालिकामा कोरोना भाइरस संक्रमण पुष्टि भएपछि न्यूरो सर्जरी बेडमा रहेकी बालिकालाई गणेशमान भवनको आइसोलेसन क्याविनमा राखिएको छ । उनीसँग सम्पर्कमा रहेका ३८ जनालाई क्वारेन्टाइनमा राखिएको अस्पतालका निर्देशक डा प्रेम कृष्ण खड्गाले बताए ।