काठमाडौं- गोर्खा भर्तीबारे पुनरवलोकन गर्दै नेपालले बेलायतलाई पत्र लेखेको छ ।

सात दशकभन्दा पहिले नेपाल, भारत र बेलायतबीच भएको एउटा त्रिपक्षीय सन्धिको पुनरवलोकन गर्न माग गर्दै नेपालले औपचारिक पत्र पठाएको देखिएको छ।

दुईदिन अघि परराष्ट्र मन्त्रालयले काठमाडौंस्थित बेलायत राजदूतावासलाई पठाएको पत्रमा नेपालले त्रिपक्षीय सन्धिको पुनरवलोकन र अवकाशप्राप्त गोर्खाका गुनासाहरूबारे वार्ताका लागि प्रस्ताव गरेको छ।

पत्रबारे परराष्ट्र मन्त्रालयका अधिकारीहरूले औपचारिक जानकारी भने नदिएको बीबीसीले उल्लेख गरेको छ ।

बेलायत उपनिवेशबाट भारत स्वतन्त्र भएपश्चात् गरिएको सन्धिकै प्रावधानका आधारमा नेपाली नागरिकहरू बेलायत र भारतीय सेनामा भर्ती हुँदै आएका छन्।

सन् १९४७ मा भएको सन्धिपश्चात् नेपालले यसप्रकारको औपचारिक पत्र पठाएको यो नै पहिलो पटक भएको बताइएको छ।

गत जुन महिनामा भएको प्रधानमन्त्री केपी शर्मा ओलीको बेलायत भ्रमणका बेला उनले समकक्षी टेरिजा मेसँग पनि सन्धि पुनरवलोकनको प्रस्ताव राखेका थिए।