बेइजिङ– चीनले कोरोनाभाइरस महामारीबाट १७ सय जनाभन्दा स्वास्थ्यकर्मी संक्रमित भएको खुलासा गरेको छ ।

महामारीबाट संक्रमितहरुको उपचार गरिरहेका १७ सय १६ जना स्वास्थ्यकर्मीहरु आफैं संक्रमित भएको चीनको समाचार संस्थान सिन्ह्वाले खुलासा गरेको हो ।

सिन्ह्वाले जनाएअनुसार कोरोनाभाइरसबाट संक्रमित ६ स्वास्थ्यकर्मीको निधन भइसकेको छ । स्वास्थ्यकर्मीहरु ‘ज्यान दाउमा राखेर काम गरिरहेको’ चीनका राष्ट्रिय स्वास्थ्य आयोगका उपमहानिर्देशक जङ यिसिनलाई उद्धृत गर्दै सिन्ह्वाले जनाएको छ ।

उनका अनुसार कोरोनाभाइरसबाट महामारीबाट सबैभन्दा धेरै प्रभावित वुहान शहरमा मात्र ११ सय २ स्वास्थ्यकर्मी संक्रमित भएका छन् । त्यसबाहेक हुबेई प्रान्तका अरु शहरहरुमा ४ सय जना संक्रमित भएको उनको भनाइ छ ।

चीनमा कोरोनाभाइरसको संक्रमणबाट हालसम्म १४ सयभन्दा धेरै मानिसको ज्यान गइसकेको छ भने अरु हजारौं संक्रमित भएका छन् ।