काठमाडौं – प्रधानमन्त्री केपी शर्मा ओलीले डाकेको संवैधानिक परिषद्को बैठकमा प्रमुख प्रतिपक्षी दलका नेता शेरबहादुर देउवा र सभामुख अग्‍निप्रसाद सापकोटा पनि अनुपस्थित भएका छन् ।

यसअघि आइतबार बिहान नौ बजेका लागि डाकिएको थियो । परिषद्को बैठकमा प्रमुख प्रतिपक्षी कांग्रेस देउवा र सभामुख सापकोटा अनुपस्थित भएपछि गणपुरक संख्या अपुग भएको छ ।

सभापति देउवा सरकारविरुद्ध हुन लागेको आन्दोलनमा सहभागी हुन मकवानपुर पुगेका कारण बैठकमा उपस्थित हुन नसकेका हुन् ।

सभामुख सापकोटाले पूर्वनिर्धारित तालिका अनुसार अन्य कार्यक्रममा सहभागी भएका कारण बैठकमा उपस्थित हुन नसक्ने सन्देश पठाएका थिए ।

प्रधानमन्त्रीका प्रेस सल्लाहकार सूर्य थापाका अनुसार दुई सदस्य अनुपस्थित भएपछि बैठक स्थगित गरिएको छ । प्रतिपक्षी नेता देउवाले पनि बैठकमा नआउने खबर पठाएका थिए ।

बालुवाटारमा बस्‍ने भनिएको बैठकमा सहभागी हुन प्रधानन्यायाशीध चोलेन्द्र शम्शेर राणा र राष्ट्रिय सभाका अध्यक्ष गणेश तिमल्सिना पुगेका थिए । ६ सदस्यीय संवैधानिक परिषद बैठकमा अध्यक्षसहित ५ जना सदस्य उपस्थि हुनुपर्ने व्यवस्था छ ।