एजेन्सी- जर्मन बुन्डेशलिगा उपाधि दाबेदार मानिएको बोरुसिया डर्टमण्डले लज्जास्पद हार बेहोरेको छ ।

शनिबार घरेलु मैदानमा डर्टमण्ड यसै सिजन शीर्ष डिभिजनमा बढुवा भएको क्लब भीएफबी स्टटगार्टसंग ५–१ गोल अन्तरले पराजित भयो ।

२६औँ मिनेटमा सिलास वामानगितुका फुन्डुले पेनाल्टीमा गोल गर्दै स्टटगार्टलाई अघि बढाएका थिए ।

जियोवन्नी रेयनाले ३९औँ मिनेटमा डर्टमण्डका लागि बराबरी गोल फर्काएका थिए ।

तर, दोस्रो हाफमा ४ गोल गर्दै पाहुना टोलीले डर्टमण्डविरुद्ध अप्रत्यासित नतिजा आत्मसाथ गरेको हो ।

सिलास वामनगितुकाले ५३औँ मिनेटमा स्टटगार्टलाई २–१ ले अघि बढाए । फिलिप फोस्टरले ६०औँ मिनेटमा पाहुना टोलीको अग्रतालाई ३–१ को अवस्थामा पुर्‍याए । त्यसको तीन मिनेटमा तन्गी कोलीबालले स्टटगार्टका लागि एक गोल थपे ।

इन्ज्युरी समयमा निकोलस गोन्जालेजले गोल गर्दै नवप्रवेशी क्लबलाई ५–१ को फराकिलो जित दिलाए ।

पराजयपछि डर्टमण्डलाई तालिकाको पाँचौ स्थानमा रहेको छ । स्टटगार्ट भने १७ अंकसहित तालिकाको छैठौँ स्थानमा छ ।