काठमाडौं- स्वास्थ्य तथा जनसंख्या मन्त्रालयले कोरोना भाइरस संक्रमितको उपचारका लागि देशभर ९ सय ४२ आइसीयु र ४ सय ९६ भेन्टिलेटर रहेको जानकारी दिएको छ ।

स्वास्थ्य तथा जनसंख्या मन्त्रालयको नियमित लाइभ अपडेटमा मन्त्रालयका प्रवक्ता डा. जागेश्वर गौतमले कोरोना संक्रमितको उपचारका लागि सो संख्यामा आइसीयू र भेन्टिलेटर व्यवस्था रहेको जानकारी दिएका हुन् ।

उनका अनुसार सबैभन्दा बढी बाग्मती प्रदेशमा ६ सय ३० आइसीयु र ३ सय ६१ भेन्टिलेटर छन्।

त्यस्तै गण्डकी प्रदेशमा १ सय ३७ आइसीयु र ५९ भेन्टिलेटर, प्रदेश २ मा ४५ आइसीयु र १७ भेन्टिलेटर, प्रदेश १ मा ४३ आइसीयु र १९ भेन्टिलेटर, कर्णाली प्रदेशमा ४० आइसीयु र १७ भेन्टिलेटर, प्रदेश ५ मा २९ आइसीयु र १३ भेन्टिलेटर र सुदूरपश्चिम प्रदेशमा १८ आइसीयु र १० भेन्टिलेटर रहेको मन्त्रालयले जनाएको छ।

मन्त्रालयका अनुसार आज थप ५२५ जनामा कोरोना भाइरसको संक्रमण पुष्टि भएसँगै नेपालमा कोरोना संक्रमितको संख्या २४ हजार ९५७ पुगेको छ । जसमध्ये १६ हजार ८३७ जना निको भएर घर फर्किएका छन् भने ९५ जनाको मृत्यु भएको छ ।

मन्त्रालयका अनुसार हालसम्म सक्रिय संक्रमितको संख्या ८ हजार २५ छ भने १४ हजार ७६९ जना क्वारेन्टाइनमा रहेका छन् ।