काठमाडौं– कोरोनाका बिरामीको उपचार गर्ने अस्पतालहरुले बिरामीको स्वास्थ्य अवस्थाका आधारमा उपचार बापतको अनुदान रकम पाउने भएका छन् ।

स्वास्थ्य तथा जनसंख्या मन्त्रालयले बनाएको कोरोना भाइरस संक्रमणको उपचार बापत अस्पतालाई अनुदान उपलब्ध गराउने सम्बन्धी आदेश, २०७७ लाई संशोधन गर्न बनेको आदेशमा बिरामीको स्वास्थ्य अवस्थाका आधारमा अस्पतालले अनुदान रकम पाउने उल्लेख गरिएको छ ।

उक्त आदेश मन्त्रिपरिषदले गत असार १५ गते स्वीकृत गरेको हो ।

आदेशमा उल्लेख भएअनुसार लक्षण नभएका वा सामान्य लक्षण भएका बिरामी होम आइसोलेसनमा रहेको अवस्थामा स्वास्थ्यकर्मीले क्लिनिकल निगरानी गरेबापत प्रति संक्रमित २०० रुपैयाँ पाउने छन् ।

यस्तै लक्षण नभएका वा समान्य लक्षण भएर आइसोलेसन केन्द्रमा रहेका संक्रमित हेरेबापत २ हजार रुपैयाँ उपलब्ध गराइने छ ।

यस्तै सामान्य लक्षण भएर अस्पतालमा उपचारत कोरोना संक्रमित हेरेबापत प्रति संक्रमित ३ हजार ५ सय उपलब्ध गराइने छ । यस्तै मध्यम जटिल बिरामी अस्पतालमा भएमा ती बिरामीको उपचार गरेबापत ७ हजार उपलब्ध गराइने जनाइएको छ ।

यस्तै जटिल र क्रिटिकल बिरामी अस्पतालमा भर्ना भएर उपचारत भएका १५ हजार उपलब्ध गराइने उक्त आदेशमा उल्लेख छ ।

आदेशमा उल्लेख भएअनुसार कोभिड १९ शंकास्पद तथा संक्रमित व्यक्तिलाई उपचार गरे बापतको रकम अस्पताल, तथा आइसोलेसन सेन्टरलाई उपलब्ध गराइने छ ।

यस्तै होम आइसोलेसनमा बस्ने बिरामीहरुको क्लिनिकल निगरानी गर्दा लाग्ने रकम सम्बन्धित स्थानीय तहलाई उपलब्ध गराइने जनाइएको छ ।

यस्तो छ अनुदान उपलब्ध गराउने सम्बन्धी आदेश