काठमाडौं– वीरगञ्जमा दुईजना पत्रकारमा कोरोना संक्रमण पुष्टि भएपछि अन्य पत्रकारहरुको पनि कोरोना परीक्षण प्रक्रिया सुरू भएको छ ।

नारायणी अस्पतालमा डाक्टर उदयनारायण सिंहका अनुसार वीरगञ्जमा रहेका सबै पत्रकारहरुको कोरोना परीक्षणका लागि थ्रोडस्वाब संकलन गरिएको छ ।

डा सिंहका अनुसार आज बिहान १ सय १० जना पत्रकारको नमूना संकलन गरी प्रयोगशालमा परीक्षण सुरू गरिएको छ ।

‘हिजो दुइजना पत्रकारमा कोरोना संक्रमण पुष्टि भएपछि आज वीरगञ्ज क्षेत्रका पत्रकारहरुको पनि नमूना संकलन गरिएको छ,’ डा सिंहले खबरहबसँग भने, ‘बिहानदेखि अहिलेसम्म १ सय १० जनाको नमूना संकलन भइसकेको छ ।’

डा सिंहका अनुसार अझै १५ जना पत्रकारको नमूना संकलन गर्ने काम बाँकी छ । आज संकलन गरिएका पत्रकारहरुको थ्रोड स्वाबको नमूना केही नारायणी अस्पतालको प्रयोगशालामा परीक्षण गरिने र बाँकीलाई राष्ट्रिय जनस्वास्थ्य प्रयोगशालामा पठाउने तयारी भएको डा सिंहको भनाई छ ।

वीरगञ्जमा हिजो (मंगलबार) मात्र दुईजना पत्रकारसहित ३९ जनामा कोरोना संक्रमण पुष्टि भएको थियो ।