काठमाडौं– पर्साको वीरगन्जमा भेटिएका ३ जना कोरोना संक्रमितको सम्पर्कमा आएका ९४ जनाको कोरोना परीक्षण शुरु गरिएको छ ।

प्रदेश नम्बर २ को सामाजिक विकास मन्त्रालयका सचिव राम प्रसाद घिमिरेले नियमित पत्रकार सम्मेलेनमा ३ जना कोरोना संक्रममितको सम्पर्कमा आएका ९४ जनाको कोरोना परीक्षण शुरु गरिएको बताएका हुन् ।

उनीहरुको कोराना परीक्षणका लागि थ्रोड स्वाब संकलन गरिएको सचिव घिमिरेले जानकारी दिए । घिमिरेले ३ जना संक्रमितको कन्ट्याक्ट ट्रेसिङ गरी ९४ जनालाई क्वारेन्टाइमा राखिएको पनि जानकारी दिए ।

वीरगन्जमा भेटिएका ३ जना कोरोना संक्रमितको नारायणी अस्पतालमा उपचार भइरहेको सचिव घिमिरेले बताए ।

सचिव घिमिरेका अनुसार तीनजना कोरोना संक्रमित राखिएको नारायणी अस्पताललाई कोरोना विशेष अस्पतालको रुपमा परिमार्जन गरिएको छ ।

नारायणी अस्पतालको अन्य रोगका बिरामीलाई नेसनल मेडिकल कलेजबाट सेवा दिने व्यवस्था गरेको सचिव घिमिरेको भनाइ छ । मेडिकल कलेजले नारायणी अस्पतालकै सेवा शुल्कमा बिरामीलाई सेवा दिने सचिव घिमिरेले बताए ।

कोरोना संक्रमितको उपचारका लागि प्रदेश २ को सामाजिक विकास मन्त्रालयले प्रदेशमा भएका निजी अस्पतालसँग पनि छलफल गरेको छ ।