काठमाडौं – नयाँ वर्षसँगै आज तीन सेलिब्रेटीको जन्मदिन पनि परेको छ । वैशाख १ अर्थात् आजको दिन नेपालका ३ चर्चित स्टारको जन्मदिन परेको छ ।

अभिनेता तथा निर्माता दीपकराज गिरी, अभिनेता दयाहाङ राई र शिवहरि पौडेलको आज जन्मदिन पनि हो । सेलिब्रेटी र फ्यानले तीनैलाई जन्मदिनको शुभकामनाका साथै नयाँ वर्षको शुभकामना दिएका छन् ।

अभिनेता दीपकराज गिरीले अभिनय गरेको पछिल्लो फिल्म ‘छ माया छपक्कै’ गतवर्ष सुपरहिट भएको थियो । यी अभिनेताको आज जन्मदिन परेको छ । सेलिब्रेटीले हिजैदेखि गिरीलाई जन्मदिनको शुभकामना दिएका छन् ।

यस्तै आजै जन्मदिन परेको दयाहाङ राईलाई पनि जन्मदिनको शुभकामनाको ओइरो लागेको छ । गत वर्ष दयाहाङ राईले अभिनय गरेको फिल्म ‘जात्रै जात्रा’ हिट भएको थियो । अरु फिल्मले औसत चर्चा कमाए पनि दयाहाङको क्रेज भने घटेको छैन ।

दयाहाङलाई पनि फ्यान र सेलिब्रेटीले सामाजिक सञ्जालमार्फत जन्मदिनको शुभकामना दिएका छन् ।

यस्तै आजै परेको जन्मदिनमा हास्यकलाकार शिवहरि पौडेललाई पनि शुभकामनाको ओइरो लागेको छ । लामो समय टेलिफिल्म ‘जिरे खुर्सानी’ मार्फत गाउँगाउँका दर्शकमाझ पुगेका शिवहरि पछिल्लो समय फिल्म क्षेत्रमा सक्रिय छन् ।

उनको निर्देशन रहेको फिल्म ‘लक्का जवान’ रिलिजका लागि तयार छ । लकडाउनका कारण फिल्मको निर्धारित मिति स्थगित गरिएको थियो ।