काठमाडौं– प्रधानमन्त्री केपी शर्मा ओली डिस्चार्ज हुनेभएसँगै अस्पतालमा शुभेच्छुक र शुभचिन्तकको भीड लागेको छ ।

दोस्रोपटक मिर्गौला प्रत्यारोपण गरेपछि अस्पतालको बसाई सकेर निवास फर्कने तयारीमा रहेका ओलीलाई भेट्न मन्त्रीहरु, नेकपाका नेताहरु, परिवारजन नेकपाका नेता कार्यकर्ताहरु त्रिवि शिक्षण अस्पताल पुगेका छन् ।

उपप्रधान एवं रक्षा मन्त्री ईश्वर पोखरेल, परराष्ट्र मन्त्री प्रदीप ज्ञवाली, प्रदेश पाँचका मुख्यमन्त्री शंकर पोखरेल, नेकपाका महासचिव विष्णु पौडेल लगायतका नेता अस्पताल पुगेका हुन् ।

प्रधानमन्त्रीलाई डिस्चार्ज गरिने भएसँगै अस्पतालमा सुरक्षाकर्मीको समेत बाक्लो उपस्थिती रहेको छ ।

दोस्रोपटक मिर्गौला प्रत्यारोपणका लागि प्रधानमन्त्री ओली फागुन १९ गते साँझ अस्पताल भर्ना भएका थिए ।

२१ गते प्रधानमन्त्रीको मिर्गौलाको प्रत्यारोपण गरिएको थियो । ओलीलाई भाञ्जी समीक्षा संग्रौलाले मिर्गौला दान गरेकी थिइन् । उनी भने बुधवार डिस्चार्ज भइसकेकी छिन् ।