काठमाडौं–नेपालका लागि वेलायती राजदूत निकोला पोलिटले कानून, न्याय तथा संसदीय मामिला मन्त्री डा. शिवमाया तुम्बाहाङ्फेसँग भेट गरेकी छन् ।

सिंहदरवारस्थित आफ्नै कार्यकक्षमा शुक्रबार भएको भेटमा राजदूत पोलिटले कानून मन्त्रालयको नेतृत्व पहिलोपटक महिलाले पाएकोमा खुसी व्यक्त गरिन् ।

मन्त्री तुम्बाहाङ्फेको कार्यकालमा नेपालको संक्रमणकालीन न्यायको प्रक्रियाले तीब्रता पाउने विश्वास व्यक्त गरेको मन्त्रालयले जनाएको छ ।

मन्त्री तुम्बाहाङ्फेले संक्रमणकालीन न्यायमा कुनै विवाद नभएको बताउँदै सत्य निरुपण तथा मेलमिलाप आयोग र बेपत्ता आयोगले कार्यादेश बमोजिम नै काम गरिरहेको जानकारी दिइन् ।

आयोगका कामलाई प्रभावकारी बनाउन सरकारले पनि सहयोग र समन्वय गरिरहेका मन्त्री तुम्बाहाङ्फेले बताइन् ।

मन्त्री तुम्बाहाङ्फेले आफू मन्त्री भएलगत्तै आयोगका पदाधिकारी र पीडितसँग अलग अलग भेटेको उल्लेख गर्दै सरोकारवालाहरुको चासोलाई सम्बोधन गरिने बताएकी छन् ।

यसैबीच मन्त्री तुम्बाहाङ्फेसँग शुक्रबार नै संयुक्त राष्ट्रसंघका आवासीय प्रतिनिधि भ्यालेरी जुनियनले समेत भेट गरेका छन् । भेटमा कानून निर्माणलगायतका विषयमा कुरा भएको जनाइएको छ ।