काठमाडौंं– कोरोना भाइरसको त्रासका बीच बजारमा ११ हजार मेट्रिक टनभन्दा बढी खाना पकाउने (एलपी) ग्यास अतिरिक्त रुपमा खपत भएको पाइएको छ ।

उपभोक्ताहरुले पछिका लागि भन्दै ग्यास मौज्दात गर्ने प्रवृति बढेपछि अहिले बजारमा एलपी ग्यासको अभाव बढेको छ ।

उद्योग वाणिज्य तथा आपूर्ति मन्त्रालयले बजारमा बढेको अभावलाई मध्यनजर गर्दै भारतबाट साविकमा आपूर्ति भइरहेको तुलनामा ११ हजार मेट्रिक टनभन्दा बढी ग्यास आपूर्ति गर्न लागिएको जनाएको छ ।

मन्त्रालयका अनुसार बजारमा अहिले नियमित भन्दा धेरै ग्यास खपत भइरहेको छ । उपभोक्ताहरुले दैनिक उपभोगका लागि आवश्यक पर्नेभन्दा बढी ग्यास खरिद गरेर मौज्दात राख्न खोज्दा ग्यासको आपूर्ति बढेको मन्त्रालयको भनाइ छ ।

बिहीबार उद्योग वाणिज्य तथा आपूर्ति मन्त्री लेखराज भट्टको नेतृत्वमा मन्त्रालयमा बसेको बैठकले बजारमा आपूर्ति सहज पार्ने निर्णय गरेको छ । बिहीबारको बैठकको निर्णयानुसार हाललाई भारतबाट नियमित आपूर्ति भइरहेको भन्दा अतिरिक्त थप ग्यास आपूर्ति गर्न लागिएको मन्त्रालयकी सहायक प्रक्वता उर्मिला केसीले जानकारी दिइन् ।

नियमित आपूर्ति भइरहेको भन्दा भारतबाट थप ११ हजार मेट्रिक टन ग्यास आपूर्ति गर्न लागिएकाले अब बजारमा ग्यासको अभाव नहुने सहायक प्रवक्ता केसीको भनाइ छ ।

सरकारले बजारमा दैनिक उपभोग्य बस्तुको अभाव हुन नदिन र सहज आपूर्तिको व्यवस्था गर्न अनुगमनलाई थप कडाइका साथ अगाडि बढाइएको जनाएको छ ।