काठमाडौं- साना उद्योगलाई मजबुत पार्न नियमित अनुगमन तथा निरीक्षण गर्न आवश्यक रहेको एक कार्यक्रमका वक्ताले बताएका छन् ।
उद्योग, वाणिज्य तथा आपूर्ति मन्त्रालयले सोमबार आयोजना गरेको ‘सेफगार्डस, एण्टी–डम्पिङ तथा काउन्टरभेलिङ’ सम्बन्धमा व्यवस्था गर्न बनेको ऐन २०७६ बारे छलफल कार्यक्रममा सहभागीहरुले साना उद्योगलाई मजबुत बनाउन आवश्यक रहेको बताएका हुन् ।

कार्यक्रममा मन्त्रालयका उपसचिव रामकृष्ण अधिकारीले स्वदेशी उद्योगमा हुन गएको हानी नोक्सानी रोक्नका लागि ‘सेफगार्डस, एण्टी–डम्पिङ तथा काउन्टरभेलिङ’ सम्बन्धमा व्यवस्था गर्न बनेको ऐन २०७६ ल्याइएको जानकारी गराए।

मुलुकको औद्योगिक क्षेत्रको प्रवद्र्धन गर्दै राष्ट्रिय अर्थतन्त्र सुदृढ बनाउन पनि यस ऐन ल्याइएको उनले बताए ।

कार्यक्रममा सहसचिव महेश आचार्यले यस ऐनले सञ्चालनमा रहेका साना उद्योगलाई ठूलो सहयोग पुग्ने जानकारी गराए ।
अधिवक्ता दीपक घिमिरेले धेरै अघि नै आउनुपर्ने भएकाले ऐनको प्रचारप्रसार गर्न सरकारले विशेष ध्यान दिनुपर्ने बताए ।