काठमाडौँ– प्रदेश नं १ मा हालसम्म २ लाख बढीको पीसीआर परीक्षण गरिएकोमा २८ हजार ८१२ जनामा कोरोना भाइरसको सङ्क्रमण पुष्टि भएको छ ।

सामाजिक विकास मन्त्रालयको तथ्यांक अनुसार शनिबारसम्म १ लाख ३८ हजार ३५९ पुरुष र ६१ हजार ८१९ महिला गरी जम्मा २ लाख १७८ जनाको पीसीआर परीक्षण गरिएको  हो ।

सामाजिक विकास मन्त्रालय कोभिड–१९ निगरानी, तथ्याङ्क सङ्कलन तथा अनुगमन समितिका संयोजक डा रविन्द्र निरौलाले दिएको जानकारी अनुसार बिपी कोइराला स्वास्थ्य विज्ञान प्रतिष्ठान धरानमा सबैभन्दा बढी ६३ हजार ९२६ जनाको  पीसीआर परीक्षण गरिएको छ ।

त्यसैगरी प्रदेश जनस्वास्थ्य प्रयोगशाला विराटनगरमा ४८ हजार ७४४, कोशी अस्पताल विराटनगरमा ४१ हजार ९००, नोबेल शिक्षण अस्पतालमा १८ हजार ७३०, मेची अस्पतालमा १० हजार ९५८, कनकाई पीसीआर प्रयोगशालामा ६ हजार ९८३, बिराट शिक्षण अस्पताल बुढीगङ्गा मोरङमा ४ हजार १४६, न्यूरो अस्पतालमा २हजार ८३२ र अन्य प्रयोगशालामा १ हजार ९५९ जनाको पीसीआर परीक्षण गरिएको छ ।

प्रदेशमा १ मा पछिल्लो २४ घण्टाको अवधिमा ५८ जना सङ्क्रमित थपिएका छन् । हालसम्म निको हुनेको सङ्ख्या २३ हजार ५८२ पुगेको छ ।