एजेन्सी – युरोपियन च्याम्पियन्स लिगको क्वाटरफाइनल खेलमा आज फ्रेन्च क्लब पेरिस सेन्ट जर्मेन (पीएसजी) र इटालियन क्लब एटलान्टाबीच प्रतिस्पर्धा हुदैछ ।

लिग वान च्याम्पियन पीएसजी र एटलान्टाबीचको खेल नेपाली समय अनुसार राति १२:४५ बजे पोर्चुगलको लिस्बनमा हुनेछ ।

स्टाडियो डा लुज रंगशालामा हुने पहिलो क्वाटरफाइनलमा दुवै टिम जित निकाल्दै सेमिफाइनलमा पुग्ने लक्ष्यसहित मैदान उत्रने छन् । दुवै टिम यस सिजन सेमिफाइनलमा पुग्ने पहिलो टिम बन्न चाहन्छ ।

पीएसजीले यस सिजन फ्रान्सको लिग वानसहित महत्वपूर्ण तीन उपाधि जितेको छ । त्यसैले थोमस टुचेलले टिम पीएसजी उच्च मनोबलमा हुनेछ ।

कोरोनाको कारण लिग रद्द भएपछि पीएसजीले पर्याप्त मात्रामा तयारीको अवसर समेत पाएको छ । यस्तै स्टार फरवार्ड नेयमारको लयको कारण पनि पीएसजी बलियो देखिएको छ ।

पीएसजी सन् २०१६ को सिजनपछि पहिलो पटक च्याम्पियन्स लिगको अन्तिम आठमा पुगेको हो । एटलान्टाले भने पहिलोपटक क्वाटरफाइनलमा पुगेको हो ।