काठमाडौं– फिफा विश्वकप २०२२ तथा एएफसी एसियन कप २०२३ अन्तर्गत संयुक्त छनोटका बाँकी खेल एक वर्ष पछि धकेलिएका छन् ।

फिफा र एसियन फुटबल महासंघ (एएफसी) ले अक्टोबर र नोभेम्बरमा हुने तय भएका विश्वकप छनोटका खेलहरु २०२१ सम्मका लागि स्थगित गरेको छ ।

बुधबार विज्ञप्ति जारी गर्दै एएफसीले फिफा र एएफसीले कोरोना भाइरसका कारण अक्टोबर र नोभेम्बरमा हुने तय भएका विश्वकप अन्तर्गतका एसियाली क्षेत्रका खेल २०२१ मा सारिएको जनाएको छ ।

स्वास्थ्यलाई मध्यनजर गर्दै फिफा एएफसीले यो निर्णय गरेको विज्ञप्तिमा भनिएको छ । कोरोनाले सिर्जना गरेको अवस्थाबारे फिफा र एएफसी मिलेर काम गर्ने र त्यसपछि मात्रै अर्को मिति तोकिनेछ ।

नेपालले विश्वकप छनोट अन्तर्गतका आफ्ना तीन खेल खेल्न बाँकी छ । चाइनीज ताइपेइ, जोर्डन र अस्ट्रेलियासँगको घरेलु मैदानमा हुने खेल नेपालले खेल्न बाँकी छ ।

यसअघि मार्चमा हुने तय भएको विश्वकप छनोटको खेल कोरोना महामारीका कारण अक्टोबर र नोभेम्बरमा गर्ने तयारी फिफा र एएफसीले गरेका थिए । तर, कोरोना कहर कम नभएपछि यस क्षेत्रका खेल अब २०२१ सम्मका लागि स्थगित गरिएको छ।