काठमाडौं– स्पेनिस महारथी बार्सिलोनाका फ्रान्सेली स्टार एन्टोइनी ग्रिज्म्यान चोटग्रस्त भएका छन् ।

बार्सिलोनाले आइतबार दिउँसो ग्रिज्म्यान चोटग्रस्त भएको जानकारी दिएको हो ।

आइतबार बिहान भालाडोलिडविरुद्धको खेलमा दाँया खुट्टामा चोट लागेपछि घाइते बनेका ग्रिज्म्यानले ला लिगाका बाँकी खेल गुमाउन सक्ने बताइएको छ ।

यद्यपि ग्रिज्म्यान कहिलेसम्म टीममा रहने छैनन् भन्ने स्पष्ट पारिएको छैन ।

‘आज बिहान चेक जाँच गर्दा पहिलो टोलीका खेलाडी ग्रिज्म्यान चोट ग्रस्त भएका छन् । उनको दाँया खुट्टामा चोट लागेको छ,’ बार्सिलोनाले जारी गरेको विज्ञप्तिमा भनिएको छ, ‘अहिले उनी टोलीमा हुने छैनन् । उनको चोटको मुल्याङ्कन गरी अभ्यासमा फर्काइनेछ ।’

भोलाडोलिडविरुद्ध पहिलो हाफ खेलेका ग्रिज्म्यान दोस्रो हाफमा चोटका कारण मैदान छिरेका थिएनन् ।

उनको स्थानमा लुइस स्वारेज मैदान प्रवेश गरेका थिए । उक्त खेलमा बार्सिलोनाले १–० को साँघुरो जीत हात पारेको थियो ।