काठमाडौं– राष्ट्रपति विद्यादेवी भण्डारीको बंगलादेश भ्रमण स्थगित भएको छ ।

कोरोना भाइरसको सम्भावित संक्रमणलाई मध्यनजर गर्दै राष्ट्रपति विद्यादेवी भण्डारीको बंगलादेश भ्रमण स्थगित गरिएको शीतल निवास स्रोतले जानकारी दिएको छ ।

राष्ट्रपति भण्डारी बंगलादेशका राष्ट्रपति अब्दुल हमिदको निमन्त्रणमा चैत ९ गते पारस्परिक भ्रमणका लागि ढाका जाने कार्यक्रम तय भएको थियो । तर, पछिल्लो समय विश्वव्यापी महामारीको रुप लिएको कोरोना भाइरसको संक्रमण बंगलादेशमा समेत बढ्दै गएपछि राष्ट्रपति भण्डारीले भ्रमण स्थगित गरेकी हुन् ।

बंगलादेशका संस्थापक नेता (राष्ट्रपिता) मानिने शेख मुजिबुर रहमानको १०० औं जन्मजयन्तिको अवसर पारेर आयोजना हुने कार्यक्रममा सहभागी हुन राष्ट्रपति त्यसतर्फ जाने कार्यक्रम तय भएको थियो । राष्ट्रपति भण्डारीले त्यहाँको संसदलाई सम्बोधन गर्ने कार्यक्रम समेत तय भएको थियो ।